မြန်မာ့ရုပ်ရှင်လုပ်ငန်းတွင် ရုပ်ရှင်လုပ်ငန်းလိုင်စင် လျှောက်ထားသူများ၏ ထက်ဝက်ခန့်သာ ရိုက်ကူး ထုတ်လုပ်မှုရှိပြီး လိုင်စင်သက်တမ်း မတိုးသည့်အတွက် အမည်ပျက်စာရင်း သွင်းခံရခြင်းများလည်း ရှိနေကြောင်း သိရှိရပါသည်။
၂၀၁၁ ခုနှစ်၊ စက်တင်ဘာလအထိ ရုပ်ရှင်ဇာတ်ကား ထုတ်လုပ်ခြင်းလိုင်စင် လျှောက်ထား ကိုင်ဆောင်သည့် ထုတ်လုပ်ရေး ၆၅ ခုရှိကြောင်း မြန်မာ့ရုပ်ရှင်လုပ်ငန်းမှ သိရှိရသည်။
“ထုတ်လုပ်ရေးအများစုက ရုပ်ရှင်နှင့် ဗီဒီယိုထုတ်လုပ်ရေး လုပ်ငန်း လိုင်စင်နှစ်ခုနဲ့ အလုပ်လုပ်ကြတာပါ။ ဒါပေမယ့်အများစုက ဗီဒီယိုရိုက်ကူး ထုတ်လုပ်တာကိုအားပြုပြီး လုပ်ကြ တယ်။ ကိုယ့်တိုက်က ရုပ်ရှင်ရိုက်မယ်ဆိုရင် အဆင်သင့်ဖြစ်အောင် ဆိုပြီးတော့ ရုပ်ရှင်ထုတ်လုပ်ခွင့်လိုင်စင် လျှောက်ကြတာပါ။ ဒီနေ့ခေတ်မှာ ရုပ်ရှင်ဇာတ်ကားတစ်ကားရဲ့ ကုန်ကျ စရိတ်ကများတော့ ရုပ်ရှင်ကိုဆက် တိုက်လုပ်တဲ့သူနည်းတယ်”ဟု ရုပ်ရှင်နှင့် ဗီဒီယိုထုတ်လုပ်ရေး လုပ်ငန်းရှင်တစ်ဦးက ဆိုပါသည်။
ရုပ်ရှင်လုပ်ငန်းလိုင်စင်တွင် ရုပ်ရှင်ဇာတ်ကား ထုတ်လုပ်လိုင်စင်၊ ရုပ်ရှင်ဇာတ်ကား ဖြန့်ချိခြင်းလိုင်စင်၊ ရုပ် ရှင်ဇာတ်ကား ပြည်ပမှတင်သွင်းခြင်း လိုင်စင်နှင့် ရုပ်ရှင်ဇာတ်ကားရိုက်ကူးခြင်းလိုင်စင်ဟူ၍ လေးမျိုးရှိသည်။
“ရုပ်ရှင်လုပ်ငန်းလိုင်စင်က တစ်နှစ်သက်တမ်းပါ။ တစ်နှစ်ပြည့်ခါနီးရင် သက်တမ်းတိုးရတယ်။ ရက်ပြည့်သွားတဲ့အထိ သက်တမ်းလာ မတိုးသေးရင် ထုတ်လုပ်ရေးကို သုံးကြိမ်သတိပေး နှိုးဆော်စာပို့တယ်။ သတိပေးစာ သုံးကြိမ်ပို့ပြီးတဲ့အထိ ရောက်မလာရင် ၃ လစောင့်ပေးတယ်။ အဲဒီ ၃ လအတွင်းမှ ပြန်လာမအပ်ရင်တော့ နာမည်ပျက်စာရင်း သွင်းတယ်။ နာမည်ပျက်စာရင်း သွင်းခံရတဲ့ ထုတ်လုပ်ရေးတွေလည်း ရှိတယ်”ဟု မြန်မာ့ရုပ်ရှင်လုပ်ငန်းမှ တာဝန်ရှိသူတစ်ဦးက ရှင်းပြခဲ့သည်။
ထို့ပြင် ရုပ်ရှင်လုပ်ငန်းလိုင်စင် ကိုင်ဆောင်ထားသူများ အနေဖြင့် လုပ်ငန်းကို ဆက်လက်လုပ်ကိုင်လိုခြင်း မရှိတော့ပါက လိုင်စင်သက်တမ်း ရှိနေစဉ်တွင် မြန်မာ့ရုပ်ရှင်လုပ်ငန်း သို့ လိုင်စင်ပြန်လည် အပ်နှံနိုင်သည်။
0 comments:
Post a Comment