ရခိုင်ပြည်နယ် မင်းပြားမြို့၏ အကြီးဆုံးဈေးဖြစ်သော မြို့မ စည်ပင်သာယာဈေးမှာ
နိုဝင်လာ ၁၂ ရက်နေ့ညက မီးလောင်ကျွမ်းခဲ့ရာ ဆိုင်ခန်း ၇ဝဝ နီးပါး မီးလောင်ဆုံးရှုံးသွားခဲ့သည်ဟု မင်းပြား မြို့နယ် ရဲတပ်ဖွဲ့က ပြောသည်။
နိုဝင်ဘာ ၁၂ရက်နေ့ ည ခုနှစ်နာရီခွဲခန့်တွင် မင်းပြားမြို့ အလယ်ပိုင်းရပ်ကွက်၊ ကမ်းနားလမ်းတွင်ရှိသော မြို့မဈေး အတွင်းရှိ စားအုန်းဆီ သိုလှောင်ထားသည့် ဆိုင်တခုမှ ကျန်ရှိသည့် မီးကြွင်းမီးကျန်မှတဆင့် တဈေးလုံး ကူးစက်
လောင်ကျွမ်းသွားခဲ့ခြင်း ဖြစ်သည်။ ဈေးဆိုင်ခန်း ၅၆၇ ခန်းနှင့် ပျံကျဈေးဆိုင်ခန်း တရာကျော်ခန့် မီးသင့်ခဲ့သည်ဟု ဆိုသည်။
“မီးသွေးမီးဖိုမှာ ကျန်တဲ့မီးကို မလောင်လောက်ဘူးထင်ပြီး သူတို့က အသာလေးထားပစ်ခဲ့တာ။ ဆီက အဲဒီပေါ် စိမ့်ကျပြီး မီးဟပ်တာကနေ လူတွေသိတော့ အရှိန်က ရနေပြီ၊ ဘယ်လိုမှ ငြှိမ်းလို့ မရတော့ဘူး။”ဟု မြို့နယ် ရဲတပ်ဖွဲ့မှ တာဝန်ကျ အရာရှိတဦးကပြောသည်။
ဆုံးရှုံးမှု တန်ဘိုး ကျပ်သိန်း ၈,၅၀၀ ကျော်ဟု အစိုးရအာဏာပိုင်များက ဆိုသော်လည်း ဈေးသူဈေးသားများကမူ သိန်းပေါင်း နှစ်သောင်းခန့် ပျက်စီးဆုံးရှုံးသွားခဲ့သည်ဟု ဆိုသည်။
“ဈေးတခုလုံးက မြေကြီးပေါ်မှာ ပြာပုံပဲကျန်ခဲ့တော့တယ်။ ဆိုင်ခန်းထဲက သိမ်းထားတဲ့ ပစ္စည်းတွေ အကုန်လောင် တယ်၊ ဘာတခုမှ သုံးလို့မရတော့ဘူး။” ဟု အထည်အလိပ်ဆိုင်ပိုင်ရှင် တဦးကပြောသည်။
လူသုံးကုန်၊ အလှကုန်၊ စားသောက်ကုန်၊ အထည်အလိပ်၊ အိမ်ဆောက်ပစ္စည်း၊ ဆေးဝါး၊ စသည့် ဆိုင်ခန်းများ အားလုံး ပစ္စည်း သယ်ယူနိုင်ခဲ့ခြင်းမရှိဟု ဆိုသည်။
မင်းပြားမြို့မီးသတ်ကား တစီးနှင့် မြောက်ဦးမြို့မှ မီးသတ်ကား နှစ်စီးတို့ဖြင့် ငြှိမ်းသတ်ခဲ့ပြီး ည ၁၀ နာရီ ၁၅ မိနစ်တွင် မီးညွန့်ကျိူးသွားခဲ့သည်။ မီသတ်ကားများ အချိန်မီ ရောက်မလာနိုင်သဖြင့် ဆုံးရှုံးမှု ပိုများခဲ့ရကြောင်း မြို့ခံများက ဝေဖန်ကြသည်။
“မီးသတ်ကားတွေက အစုတ်တွေချည်းပဲ တစီးဆိုရင် နှိုးလို့ကို မရဘူး။ တခြားကလာတဲ့ ကားတွေကလည်း လမ်းမကောင်းတော့ အချိန်မှီ မရောက်တော့ လောင်နေတာ ထိုင်ကြည့်နေရတယ်။” ဟု မင်းပြားမြို့ခံ တဦးက
ပြောသည်။
ရခိုင်ပြည်နယ် ဝန်ကြီးချုပ်က နိုဝင်ဘာလ ၁၃ ရက်နေ့က မီးသင့်ခဲ့သည့် ဈေးကြီးအား လာရောက်ကြည့်ရှု့သွားခဲ့ ပြီးနောက် ဈေးစည်ပင်က ဈေးအနီး မြေကွက်လပ်တွင် ယာယီဈေး ဆောက်လုပ်ပေးရန် စီစဉ်နေကြောင်းလည်း မြို့နယ် ရဲစခန်းက ပြောသည်။
0 comments:
Post a Comment