ပြည်နယ်နှင့်တိုင်းဒေသကြီး ဗဟိုဦးစီးအဖွဲ့ဝင်များနှင့် လုပ်ငန်းအဖွဲ့များ ဆွေးနွေးဆုံးဖြတ်ချက်အရ NLD ပါတီ မှတ်ပုံတင်မည်ဖြစ်ပြီး လာမည့်ကြားဖြတ်ရွေးကောက်ပွဲတွင် လစ်လပ်မဲဆန္ဒနယ်အားလုံးတွင် ဝင်ရောက်ယှဉ်ပြိုင်မည်ဖြစ်ကြောင်း ပါတီခေါင်းဆောင်ဒေါ်အောင်ဆန်းစုကြည်က ပြောကြားလိုက်သည်။
ပြောင်းလဲလိုက်သောနိုင်ငံရေးပါတီများ မှတ်ပုံတင်ရေးဥပဒေအရ အကျဉ်းကျခံရသူများကို ပါတီဝင်အဖြစ်မှ ထုတ်ပယ်ရန် မလိုအပ်တော့ခြင်း၊ ဖွဲ့စည်းပုံကို လေးစားလိုက်နာရမည်ဟု ပြင်ဆင်လိုက်ခြင်းနှင့် အမျိုးသားလွှတ်တော်နာယက က ၁၉၉၀ ရွေးကောက်ပွဲရလဒ်ကို အသိအမှတ်ပြုကြောင်း မီဒီယာများသို့ ပြောကြားခဲ့ခြင်း စသည့်အချက်များသည် ပါတီမှတ်ပုံတင်ရန် လက်ခံထိုက်သော အကြောင်းအရာများဖြစ်ကြောင်း ဒေါ်အောင်ဆန်းစုကြည်က ဆက်လက်ပြောကြားသည်။"နေရာ ၄၀ ကျော်နဲ့ ဘာလုပ်ရမှာလဲလို့ ပြောတဲ့သူတွေရှိပါတယ်။ အဲဒီ ၄၀ ကျော်နေရာအားလုံးမှာ အနိုင်ရအောင်လုပ်ပြီး ကြိုးစားကြပါလို့ပဲ တိုက်တွန်းပါတယ်"
ဟု သူမက ပြောကြားသွားခဲ့သည်။ ကြားဖြတ်ရွေးကောက်ပွဲ လစ်လပ်နေရာများမှာ တစ်နိုင်ငံလုံးအနေအထားအရ ၄၈ နေရာရှိပြီး အမျိုးသားလွှတ်တော် ၆ နေရာ၊ တိုင်းဒေသကြီးလွှတ်တော် ၂ နေရာ၊ ပြည်သူ့လွှတ်တော် နေရာ ၄၀ တို့ဖြစ်သည်။
အဆိုပါ လစ်လပ်နေရာ ၄၈ နေရာတွင်ဝင်ပြိုင်ရန်အတွက် ပါတီအတွင်းရွေးချယ်ရာတွင် သဘောထားကြီးကြီးနှင့် အနာဂတ်ကိုကြည့်ပြီး ရွေးချယ်ရမည်ဖြစ်ကာ ထိုရွေးချယ်မှုသည် စမ်းသပ်မှုတစ်ရပ်ဖြစ်သည်ဟု သူမက ထပ်လောင်းပြောကြားသည်။ အဆိုပါကြားဖြတ်ရွေးကောက်ပွဲတွင် ဒေါ်အောင်ဆန်းစုကြည်ကိုယ်တိုင် ၀င်ရောက်ယှဉ်ပြိုင်ရန် ရှိ၊ မရှိကိုမူ ယခုအထိ ထုတ်ဖော်ပြောကြားခြင်းမရှိသေးပေ။
အိဖြူလွင် (7Day News)
0 comments:
Post a Comment