ပါလီမန်တို့ ရွေးကောက်ပွဲတို့ဆိုတဲ့ နိုင်ငံရေးလုပ်ငန်းစဉ်တွေနဲ့ လုံးလုံးကြီး အဆက်ပြတ်သွားတာ နှစ်ပေါင်း ၅ဝ ကျော်ရှိပြီ ဖြစ်လေတော့ ဒီနေ့ အသက် ၆ဝ တန်းရောက်နေ သူတွေတောင် ကြားဖူးနားဝ သိနေတာတွေပဲ ရှိလိမ့်မယ်။ သေသေချာချာ ရေရေရာရာ သိကြမှာ မဟုတ်ဘူး။
လိမ်လို့လိမ်မှန်း မသိ
စာလေးပေလေး ဖတ်ရကောင်းမှန်းသိလို့ အတန်အသင့် သိနေတယ်ဆိုလည်း မလုံလောက်ဘူး။ ကိုယ်တွေ့မျက်မြင် ကြုံတွေ့ရတာလောက်တော့ ဘယ်ဟာမှ မပြည့် စုံဘူး။ ဒါပေမဲ့ လုံးလုံးမသိတာ ထက်တော့ အများကြီးသာတယ်။ ဒါကြောင့် စာတော့အချိန်ရသလောက် ဖတ်နေသင့်တယ်။ စာမဖတ်ရင် လိမ်လို့ လိမ်မှန်းမသိ၊ ညာလို့ ညာမှန်းမသိ ဖြစ်တတ်တယ်။ အထူးသဖြင့် အခုလို သမိုင်းလှည်းဘီး တစ်ပတ်ပြန်လည်လာချိန်မှာ ရှေးကအလိမ်ခံခဲ့ ရတာတွေကို သိထားဖို့ ပိုလိုအပ်တယ်။ ဘာကြောင့် လဲဆိုတော့ သမိုင်းဖြစ်စဉ်တွေဟာ ထပ်ခါတလဲလဲ တစ်ကျော့ပြီး တစ်ကျော့ ပြန်ပြန်ဖြစ်တတ်တဲ့ သဘောရှိလို့ပဲ။
နဝေတိမ်တောင်
ဆရာကြီး ဒေါက်တာသန်းထွန်းကတော့ ပညာရှင်ပီသစွာ လိုရင်းကို ‘ဒက်’ခနဲ ပြောလိုက်တယ်။ ‘သမိုင်းသင်တာ မအ,အောင်’လို့တဲ့။ တစ်ခွန်းတည်းပဲ။ ဒါပေမဲ့ အဓိပ္ပာယ် အများကြီး ထွက်တယ်။ အ,ရင် လိမ်လို့ လိမ်မှန်းမသိ၊ ညာလို့ညာမှန်း မသိဖြစ်ပြီး ‘နဝေတိမ်တောင်’နဲ့ ခဏခဏ အလိမ်ခံရတယ်။ လိမ်မှန်းမသိလို့ လိမ်တိုင်းခံတာတွေ သိပ်များလာတဲ့ အခါကျတော့၊ လိမ်တဲ့သူတွေက ကိုယ့်ကိုလူလို့ သဘောထားပြီး လိမ်ပြောဖို့တောင်ကြိုးစား မနေတော့ဘဲ သူလုပ်ချင်တာ ကို ပြောင်ပြောင်တင်းတင်းပဲ လုပ်ချတော့တယ်။ ဒီလိုနဲ့ပဲ လစ်ဗျားကက ဒါဖီလို၊ ဆီးရီးယားက အာဆတ်လို၊ အီရတ်က ဆက်ဒမ်ဟူစိန်လို အာဏာရှင်တွေ ပေါ်ပေါက်လာခဲ့တာ ဖြစ်တယ်။
လူတိုင်း စာတတ်မြောက်ဖို့လို
အဲဒီနိုင်ငံတွေမှာ စာမတတ်သူ ဦးရေလည်း အတော်များတယ်။ အထူးသဖြင့် အမျိုးသမီး စာမတတ်သူတွေ များတယ်။ ဒါကြောင့် အာဏာရှင်တွေ သက်ဆိုးရှည်ခဲ့ကြ တယ်။ ဒီမိုကရေစီစနစ် ထူထောင်မယ်ဆိုရင် နိုင်ငံသားတိုင်း စာတတ်မြောက်ရေးကို မဖြစ်မနေလုပ်ဆောင် ကြရတယ်။ ဒီမိုကရေစီစနစ် ဆိုတာ နိုင်ငံသားတွေ ကိုယ်တိုင်နိုင်ငံရေးမှာ ပါဝင်ဆောင်ရွက်ခြင်း ဖြစ်တယ်။ ဘုရင်တွေ အာဏာရှင်တွေက ရာဇပလ္လင်ကြီးတွေမှာ ထိုင်ပြီး၊ တိုင်းသူပြည်သားတွေကို ကျေးကျွန်တွေလို တစ်ချက်လွှတ် အမိန့်အာဏာနဲ့ အုပ်ချုပ်တာမဟုတ်ဘူး။ တိုင်းသူပြည်သားတွေက သူတို့ရဲ့ ကိုယ်စားလှယ်တွေကို သူတို့စိတ်ကြိုက် ဆန္ဒပေးရွေးချယ်ပြီး အဲဒီ ကိုယ်စားလှယ်တွေ ပါဝင်တဲ့ ပြည်သူ့လွှတ်တော်က တစ်ဆင့် တိုင်းရေးပြည်မှု ကိစ္စမှန်သမျှကို ဆောင်ရွက်တာဖြစ်တယ်။
ဒီမိုကရေစီရဲ့ သော့ချက်
လူမှန်နေရာမှန်ကို ရွေးချယ်ခြင်းဟာ ဒီမိုကရေစီရဲ့ သော့ချက်ဖြစ်တယ်။ အဲဒီလို ရွေးချယ်တတ်ဖို့၊ လူကို အကဲခတ်တတ်ဖို့ဆိုတာ စာတတ်ရုံနဲ့တင်မရဘူး။ စာများများ ဖတ်ထားဖို့လိုတယ်။ ကိုယ်စားလှယ် အဖြစ် အရွေးခံမယ့်သူတို့၊ နိုင်ငံ ရေးပါတီတို့ဆိုတာက ထုံးစံအတိုင်း တိုင်းပြည်တိုးတက်အောင် ဘာလုပ်မယ်၊ ညာလုပ်မယ် ပြောကြ တာ ချည်းပဲ။ အဲဒီတော့ သေသေချာချာ ဆန်းစစ်ဝေဖန်ပြီး အရွေးမမှားဖို့အတွက် အဲဒီလူတွေနဲ့ အဲဒီပါတီတွေအကြောင်း ကောင်းကောင်း သိထားဖို့လိုတယ်။ သူတို့ ဘာတွေ ပြောတယ်ဆိုတာထက် သူတို့ဘာတွေ လုပ်ခဲ့တယ်၊ ဘာတွေလုပ်နေတယ် ဆိုတာကို ဆန်းစစ်ရမယ်။ စာဖတ်မထားရင် ဒါတွေဘာမှ မသိနိုင်ဘူး။
မီးမရှိ မီးခိုးမရှိ
လတ်တလော ကိစ္စလေးတွေ ကို ကြည့်ရုံနဲ့လည်း မလုံလောက် သေးဘူး။ သမိုင်းဟာ သူ့အလိုလို တစ်ကျော့ပြန်လည်လာတတ်တယ် ဆိုတဲ့စကားအတိုင်း လူ့သမိုင်းဖြစ် ရပ်တွေဟာ ထပ်ခါထပ်ခါ ဖြစ်တတ်တဲ့သဘောကို နားလည်ထားဖို့လည်း လိုတယ်။ အကြောင်းအရာတစ်ခု၊ ကိစ္စတစ်ခုကို ဆန်းစစ်တဲ့အခါမှာ ဘာကြောင့်ဖြစ်လာ ရတယ် ဆိုတဲ့ အကြောင်းရင်းဇာစ်မြစ်ကို ရှာကြည့်ရတယ်။ မီးမရှိဘဲနဲ့ မီးခိုးမရှိနိုင်ဘူးဆိုတဲ့ ကျိုးကြောင်းဆက်စပ်မှု သဘောတရားကို အခြေခံပြီးဆန်းစစ်မှ အမှန်ကို သိနိုင်တယ်။ ဒီလိုသိမှ လူမှန်နေရာမှန် ဖြစ်အောင် ရွေးချယ်နိုင်မှာဖြစ်တယ်။ ဒါကြောင့် အတိတ်သမိုင်းကို မေ့ပစ်လို့မရဘူး။ ဖျောက်ပစ်လို့ မရဘူး။ အတိတ်ကြောင့် ပစ္စုပ္ပန် ဖြစ်လာ တယ်။ ပစ္စုပ္ပန်က အနာဂတ်ကို ဖန်တီးမှာ ဖြစ်တယ်။
ဖွင့်ပြီး ပျောက်သွားတာ မဖြစ်ရအောင်
လူတွေကို စာတတ်အောင် အရင်ဆုံးလုပ်ရမယ်။ ပြီးတော့ စာဖတ်အောင် အမြဲနိူးဆော် နေရမယ်။ ကျောင်းသားတွေရော ပြည်သူလုထုပါ စာဖတ်ချိန်ရအောင် လည်း လုပ်ပေးရမယ်။ နောက်ပြီး လူတွေစာအုပ်ဝယ် ဖတ်နိုင်အောင်လည်း မဖြစ်မနေလုပ်ဆောင်ပေးဖို့ လိုတယ်။ စာတတ်ပြီး စာမဖတ်သူ တွေများနေတာ မကောင်း ဘူး။ ကျောင်းတိုင်း ရပ်ကွက်တိုင်းမှာ စာကြည့်တိုက်တွေ ရှိသင့်တယ်။ ရှိတယ်ဆိုရုံ ရှိနေတာမျိုး ပြောတာ မဟုတ်ဘူး။ စာအုပ်တွေရော စာဖတ်သူတွေပါ အမြဲတမ်း စည်ကားနေတဲ့ တကယ့်စာကြည့်တိုက်ကို ပြောတာ။ ဖွင့်ပြီးမကြာခင် ပျောက်သွားတာမျိုး မဖြစ်အောင်လည်း ထိန်းသိမ်းတတ်ဖို့ လိုတယ်။ တိုင်းသူပြည်သားတွေ စာများ များ ဖတ်မှ လူမှန်နေရာမှန် ရွေးပေးတတ်မှာပါ။ ဒါကြောင့် ဒီမိုကရေစီခေတ် တကယ်ဖြစ်ချင်ရင် စာဖတ်သူတွေ များလာအောင် မဖြစ်မနေလုပ်ကြဖို့ လိုတယ်လို့ သတိပေး နှိုးဆော်လိုက် ချင်ပါတယ်။
လူထုစိန်ဝင်း ၂ဝ.၃.၂ဝ၁၂
0 comments:
Post a Comment