လွတ်ငြိမ်းချမ်းသာခွင့် ပေးလိုက်သူများထဲတွင် နိုင်ငံရေး အကျဉ်းသားများ ပါဝင်

ယနေ့နံနက်ပိုင်း္ပ ပြစ်ဒဏ်လွတ်ငြိမ်းခွင့်ဖြင့် အင်းစိန်ထောင်မှ လွတ်မြောက်လာသူအချို့ ၈၈မျိုးဆက် ကျောင်းသားများအဖွဲ့

ရုံးခန်းသို့ ရောက်ရှိလာပြီးနောက် ၈၈မျိုးဆက်ကျောင်းသားများနှင့် တွေ့ရစဉ်။

နိုင်ငံတော်သမ္မတ ဦးသိန်းစိန်သည် အကျဉ်းထောင် အသီးသီးမှ နိုင်ငံသားနှင့် နိုင်ငံခြားသား အကျဉ်းသား စုစုပေါင်း (၈ဝ) ဦးတို့အား ၂၀၁၂ ခုနှစ် ဇူလိုင်လ ၃ ရက်နေ့မှစ၍ ပြစ်ဒဏ်လွတ်ငြိမ်းခွင့်နှင့် ပြည်နှင်ဒဏ်ပေးခဲ့ကြောင်း တရားဝင်ထုတ်ပြန်ချက်အရ သိရသည်။

အဆိုပါထုတ်ပြန်ချက် အပြည့်အစုံမှာ ''ပြည်ထောင်စုသမ္မတ မြန်မာနိုင်ငံတော် နိုင်ငံတော်သမ္မတသည် နိုင်ငံတော် တည်ငြိမ်ရေးနှင့် ထာဝရငြိမ်းချမ်းမှု ဖော်ဆောင်ရေးအတွက် လည်းကောင်း၊ အမျိုးသား ပြန်လည်စည်းလုံး ညီညွတ်ရေးအတွက် လည်းကောင်း၊ နိုင်ငံရေး လုပ်ငန်းစဉ်များတွင် အားလုံးပါဝင်နိုင်ခွင့်ရှိစေရေးအတွက်လည်းကောင်း၊ လူသားချင်း-စာနာထောက်ထားမှုကို အလေးပေးသောအားဖြင့် လည်းကောင်း၊ နိုင်ငံတော်၏ မေတ္တာနှင့် စေတနာကို နားလည်ကြပြီး နိုင်ငံတော် တည်ဆောက်ရေးတွင် တစ်ဖက်တစ်လမ်းမှ အထောက်အပံ့ ဖြစ်စေသည့် နိုင်ငံသားများ အဖြစ်သို့ ပြုပြင်ပြောင်းလဲစေရန်အတွက်လည်းကောင်း ရည်ရွယ်၍ နိုင်ငံတော် ဖွဲ့စည်းပုံ အခြေခံ ဥပဒေပုဒ်မ ၂၀၄ (က) နှင့်အညီ အကျဉ်းထောင် အသီးသီးမှ နိုင်ငံသား အကျဉ်းသား ၃၇ ဦး၊ နိုင်ငံသား အကျဉ်းသူ ကိုးဦး စုစုပေါင်း ၄၆ ဦး နှင့် နှစ်နိုင်ငံ ချစ်ကြည်ရေး၊ နိုင်ငံအချင်းချင်း မိတ်ဝတ်မပျက် ဆက်ဆံရေး တို့ကို ရှေးရှုသောအားဖြင့် လည်းကောင်း၊ လူမှုရေးအရ ငဲ့ညှာသောအားဖြင့် လည်းကောင်း နိုင်ငံခြားသား အကျဉ်းသား ၃၄ ဦး စုစုပေါင်း ၈၀ ဦးတို့အား ပြစ်မှုဆိုင်ရာ ကျင့်ထုံးဥပဒေ ပုဒ်မ ၄၀၁(၁) အရ မြန်မာ သက္ကရာဇ် ၁၃၇၄ ခုနှစ်၊ ပထမဝါဆို လပြည့်နေ့(ခရစ်နှစ် ၂၀၁၂ ခုနှစ်၊ ဇူလိုင်လ ၃ ရက်နေ့) မှစ၍ ပြစ်ဒဏ် လွတ်ငြိမ်းခွင့် ပြုခဲ့ကြောင်းနှင့် နိုင်ငံခြားသားများအား ပြည်နှင်ဒဏ် ပေးခဲ့ကြာင်း သိရှိရသည်'' ဟု နိုင်ငံပိုင်မီဒီယာများတွင် ဖော်ပြခဲ့ပါသည်။

ဇူလိုင်လ ၃ ရက်နေ့ လွတ်ငြိမ်းခွင့် ပေးလိုက်သူများထဲတွင် နိုင်ငံရေးအကျဉ်းသားများ ပါဝင်ပြီး ၎င်းတို့ထဲတွင် ကလေး ထောင်က ကိုအေးအောင်၊ သရက် ထောင်က ကိုသန်းဇော်၊ ပြည်ထောင်မှ ကိုပြည့်ဖြိုးအောင်၊ ကသာထောင်မှ ကိုအောင်အောင်ဦးတို့ ပါဝင်ကြောင်း သိရသည်။

၎င်းတို့တွင် ကိုအေးအောင်သည် ပုဒ်မ် ၅(ည)၊ ၁၇/၁ နှင့် ၁၇/၂၀ တို့ဖြင့် ထောင်ဒဏ် ၅၉ နှစ်ကျခံနေရသူဖြစ်ပြီး ကိုသန်းဇော်မှာ ပုဒ် ၁၂၂(၁) ၊ ၅(ည)၊ ၃၀၂(၁) တို့ဖြင့် ထောင်ဒဏ် တစ်သက်တစ်ကျွန်းနှင့် နှစ် ၂၀ ကျခံနေရသူ ဖြစ်ပါသည်။

လွတ်ငြိမ်းချမ်းသာခွင့်အမိန့်ဖြင့် အင်းစိန်အကျဉ်းထောင်မှ ၉ ဦးလွတ်မြောက်လာပြီး အမျိုးသား ၆ ဦးနှင့် အမျိုးသမီး ၃ဦး ဖြစ်ကြောင်း သိရပါသည်။ အဆိုပါ ၉ ဦးတွင် ၆ ဦးမှာ နိုင်ငံရေးပုဒ်မများဖြင့် အကျဉ်းကျခံနေရသူများ ဖြစ်ကြောင်း သိရသည်။

ထို့အပြင် မြင်းခြံထောင်၌ ထောင်ဒဏ် ၁၉ နှစ်ကျခံနေရသူ ဒေါက်တာကျော်ကျော် ပြန်လည် လွတ်မြောက်လာပြီး မြင်းခြံအကျဉ်းထောင်၌ပင် အကျဉ်းကျခံနေရသော ကယန်းနိုင်ငံရေးသမား ကောရိယိုလည်း လွတ်မြောက်လာကြောင်း စုံစမ်းသိရှိရပါသည်။ ဒေါက်တာ ကျော်ကျော် ပြန်လည် လွတ်မြောက်လာခြင်းကို အတည်ပြုချက် ရရှိထားပြီး ကောရိယို ပြန်လည် လွတ်မြောက်လာခြင်းကို အတည်ပြုချက် ရယူနေဆဲ ဖြစ်ပါသည်။

ထို့အပြင် ထားဝယ်ထောင်မှ လွတ်မြောက်လာသူများတွင် နိုင်ငံရေး အကျဉ်းသား ၃ ဦးပါဝင်ပြီး မ၀ါ၊ မဦးနှင့် ကိုမင်းလွင်တို့ ဖြစ်ကာ ပုဒ်မ ၁၇/၁ ဖြင့် ထောင်ဒဏ်ကျ ခံနေရသူများ ဖြစ်ပါသည်။ ကော့သောင်းထောင်၌ ပုဒ်မ ၁၇/၁၊ ၁၃/၁ တို့ဖြင့် ထောင်ဒဏ် ကျခံနေရသူ ဒေါ်ဝင်လည်း ပြန်လည် လွတ်မြောက် လာသူများ ထဲတွင် ပါဝင်ခဲ့ကြောင်း သိရပါသည်။

လွတ်ငြိမ်းချမ်းသာခွင့် အမိန့်ဖြင့် ယနေ့နံနက်ပိုင်း၌ အင်းစိန်ထောင်မှ ပြန်လည် လွတ်မြောက်လာသူများ စာရင်း

၁) စောဝီလျံ( ၁၇/၁၊ ၁၃/၁)
၂) စောဖရန်စစ် (၁၇/၁)
၃) အန်ထော်နီ (၁၇/၁)
၎) ထွန်းမြတ်သူ (၁၇/၁)
၅) ကိုမြင့်ကြိုင် (၁၇/၁၊ ၁၃/၁)
၆) ကိုအေးသိန်း(ခ) ရန်နိုင် (၁၇/၁၊ ၁၃/၁)
၇) ကိုဇော်မင်းအောင် (၁၇/၁)
၈) ကိုစောနိုင်ဝင်း (၁၇/၁)
၉) ကိုမိုးသီး(ခ) အောင်မိုးဇော် (အသင်းအဖွဲ့ ၇၊ ၁၃/၁)
၁၀) မအေးအေးနွယ် (၁၇/၁၊ ၁၃/၁)
၁၁) မဇာဏီဦး (၁၇/၁၊ ၁၃/၁)

Updated 12:45 PM

လွတ်ငြိမ်းချမ်းသာခွင့်ဖြင့် လွတ်မြောက်လာသူ နိုင်ငံသားအကျဉ်းသား ၄၆ ဦးတွင် လက်ရှိအချိန်အထိ (မွန်းလွဲ ၁၂ နာရီ ၄၅ မိနစ်အချိန်အထိ) နိုင်ငံရေးအကျဉ်း ၂၁ ဦးပါဝင်ကြောင်း အတည်ပြုပြီး သတင်းများအရ သိရှိရပါသည်။

Updated 1:00 PM

ကယန်းနိုင်ငံရေးသမား ကောရိယို ပြန်လည်လွတ်မြောက်သည်မှာ မှန်ကန်ကြောင်း ကယန်းလူငယ်အဖွဲ့မှ အတည်ပြုချက် ပေးခဲ့ပါသည်။

ဘားအံထောင်မှ ကိုအောင်နိုင်လည်း ပြန်လည်လွတ်မြောက် လာကြောင်း သိရပါသည်။

လက်ရှိအချိန်အထိ လွတ်မြောက်လာသူ နိုင်ငံသား အကျဉ်းသား ၄၆ ဦးတွင် နိုင်ငံရေးအကျဉ်းသား ၂၃ ဦး ပါဝင်ကြောင်းကို အတည်ပြုပြီး သတင်းများအရ သိရပါသည်။

Update 1:25 PM

မန္တလေး အိုးဘိုထောင်မှ ဦးဝီရိယ (ခ) တိုက်ကြီး(ခ) ခင်ဇော်ဝင်း အသက်(၃၅) နှစ် ပြန်လည် လွတ်မြောက်လာကြောင်း သိရသည်။ ဦးဝီရီယသည် စစ်ကိုင်းတောင်ရိုး၊ သာသနသိပ္ပံကျောင်းမှ သံဃာတစ်ပါးဖြစ်ပြီး ၂၅-၁၁-၂၀၀၉ ခုနှစ်တွင် ပုံနှိပ်နှင့် ဗီဒီယို အက်ဥပဒေများဖြင့် ထောင်ဒဏ် ၁၀ နှစ် ကျခံခဲ့ရသူ ဖြစ်သည်။

လက်ရှိအချိန်အထိ လွတ်မြောက်လာသူ နိုင်ငံသားအကျဉ်းသား ၄၆ ဦးတွင် နိုင်ငံရေးအကျဉ်းသား ၂၄ ဦး ပါဝင်ကြောင်းကို အတည်ပြုပြီး သတင်းများအရ သိရပါသည်။

Updated 2:38 PM

ယနေ့နံနက်ပိုင်းတွင် ကလေးအကျဉ်းထောင်မှ ပြန်လည် လွတ်မြောက်လာသော ကိုအေးအောင်အား ကလေးမြို့ရှိ တည်းခိုရာ နေအိမ်၌ တွေ့ရစဉ်။ ကိုအေးအောင်သည် ၁၉၉၈ ခုနှစ်တွင် ထိန်းသိမ်းခံရပြီး ၁၉၉၉ ခုနှစ်တွင် ပုဒ်မ ၅(ည)၊ ၁၇/၁ နှင့် ၁၇/၂၀ တို့ဖြင့် ထောင်ဒဏ် ၅၉ နှစ်ကျခံနေရသူ ဖြစ်ပါသည်။

Updated 2:40 PM

မန္တလေး အိုးဘိုထောင်မှ ပြန်လည် လွတ်မြောက်လာသော ဦးဝီရိယ (ခ) တိုက်ကြီး(ခ) ခင်ဇော်ဝင်းကို တွေ့ရစဉ်။ ဦးဝီရီယသည် စစ်ကိုင်းတောင်ရိုး၊ သာသနသိပ္ပံကျောင်းမှ သံဃာတစ်ပါးဖြစ်ပြီး ၂၅-၁၁-၂၀၀၉ ခုနှစ်တွင် ပုံနှိပ်နှင့် ဗီဒီယို အက်ဥပဒေများဖြင့် ထောင်ဒဏ် ၁၀ နှစ် ကျခံခဲ့ရသူ ဖြစ်သည်။

Eleven Media Group

Posted in: သတင်း