အဂတိ လိုက်စားမှု တိုက်ဖျက်ရေးအတွက် လွှတ်တော်နဲ့ ပြည်သူတို့မှာ တာဝန်ရှိ

တရားဥပဒေ စိုးမိုးရေးကို တကယ်တမ်း စတင် လုပ်ဆောင်ရတဲ့ နေရာဟာ ဥပဒေပြု လွှတ်တော် ဖြစ်ပါတယ်။ တရားဥပဒေ စိုးမိုးနိုင်မှ --- ထပ်ပြီး ပြောရရင် အစိုးရနဲ့ လူထု နှစ်ရပ်စလုံးအပေါ် တရားဥပဒေ စိုးမိုးနိုင်မှ အဂတိ လိုက်စားတာ အပါအဝင် အခြားကိစ္စပေါင်းများစွာကို တိုက်ဖျက်နိုင်မှာ၊ ပြုပြင်နိုင်မှာ ဖြစ်ပါတယ်။

အဂတိလိုက်စားမှုကို တိုက်ဖျက်ရာမှာ လက်ရှိ မြန်မာနိုင်ငံရဲ့ အခြေအနေအရ အစိုးရရဲ့ အမိန့်၊ ကြေညာချက်၊ စည်းကမ်းတွေနဲ့ မလုံလောက်တဲ့အတွက် ဥပဒေပြဌာန်းပေးရတာ ဖြစ်ကြောင်း ရှင်းသွားပါပြီ။

ဒါဟာ ရှက်စရာကိစ္စ မဟုတ်ဘဲ ဂုဏ်ယူစရာသာ ဖြစ်ပါတယ်။ ဝမ်းသာအားရ ကြိုဆိုရမယ့် ကိစ္စလည်း ဖြစ်ပါတယ်။ နိုင်ငံတိုင်းဟာ အဂတိလိုက်စားမှုကို တိုက်ဖျက်နေကြပြီး ကောင်းသထက်ကောင်းအောင် ပြုပြင်ရင်းနဲ့ ဂုဏ်ယူနေကြပါတယ်။

မြန်မာနိုင်ငံမှာ အခုဆိုရင် လွှတ်တော်ဟာ မှန်ကန်တဲ့ နိုင်ငံရေးလမ်းကြောင်းပေါ်မှာ ခြေချနိုင်ဖို့ အားယူနေပါပြီ။ နည်းနည်းတော့ ဒယိမ်းဒယိုင် ဖြစ်နေတာ ရှိပါတယ်။ ပိုပြီးအားကောင်းလာစေဖို့ နိုင်ငံရေးသမားကောင်းတွေကို အားဖြည့်ရမှာ ဖြစ်ပါတယ်။ အရည်အချင်း မပြည့်ဝသူတွေနေရာမှာ ပြည့်ဝသူတွေနဲ့ အစားထိုးရမှာလည်း ဖြစ်ပါတယ်။

လွှတ်တော်မှန်သမျှဟာ ပြည်သူ့အကျိုးစီးပွားကိုသာ ဦးထိပ်ပန်ဆင် သယ်ပိုးနေတာ ဖြစ်တယ် ဆိုတဲ့ ခံယူချက်ကို ပြည်သူကို ကိုယ်စားပြု ရွေးချယ်တင်မြှောက်ခံရတဲ့ လွှတ်တော်အမတ်တွေက အမြဲသက်သေထူ ထိန်းသိမ်းနေရမှာ ဖြစ်ပါတယ်။

မကြာခင် ထွက်လာတော့မယ့် အဂတိ တိုက်ဖျက်မှု ဥပဒေကြမ်းကို ပြည်သူတွေအားလုံးက လေ့လာကြပါ။ လိုအပ်တာတွေကို ပြတ်ပြတ်သားသား ထောက်ပြကြပါ။ အဂတိလိုက်စားမှုကို ဒီတကြိမ်မှာ လုံးဝ အမြစ်ပြတ် တိုက်ဖျက်နိုင်မှ မြန်မာနိုင်ငံဟာ ဂျပန်၊ စင်ကာပူတို့လို ခိုင်မာတဲ့ တိုးတက်ဖွံ့ဖြိုးမှုမျိုးကို မြန်မြန်ဆန်ဆန် ရယူနိုင်မှာ ဖြစ်ပါတယ်။ ဆုံးရှုံးသွားတာတွေကိုလည်း ပြန်လည်ရယူနိုင်မှာ ဖြစ်ပါတယ်။

စက်မှုစီမံကိန်းတွေ ဘယ်လောက်ပဲကောင်းကောင်း၊ နိုင်ငံခြားနဲ့ နိုင်ငံပိုင် ငွေရင်းမြှပ်နှံမှုတွေ ဘယ်လောက်များများ အဂတိ လိုက်စားမှုတွေ ရှိနေသရွေ့ တိုင်းပြည်မတိုးတက်ဘဲ ခရိုနီတွေသာ ကြီးပွားချမ်းသာသွားမှာ ဖြစ်ပါတယ်။ ဆင်းရဲမွဲတေမှုကိုလည်း ဘယ်တော့မှ တိုက်ဖျက်နိုင်မှာ မဟုတ်ပါဘူး။ ဒါကိုကြည့်ရင် ဘာကြောင့် အဂတိလိုက်စားမှု တိုက်ဖျက်ရေး ဥပဒေ လိုအပ်သလဲလို့ သိနိုင်ကြမှာ ဖြစ်ပါတယ်။

ပြည်သူတွေမှာ အစိုးရကို ဝိုင်းဝန်း တည့်မတ် ထိန်းကျောင်းဖို့ တာဝန်ရှိပါတယ်။ လုပ်ပိုင်ခွင့်လည်း ရှိပါတယ်။ ဒီမိုကရေစီ နိုင်ငံရေးစနစ်မှာ အစိုးရကို ပြည်သူတွေက ရွေးချယ်ထားတာ ဖြစ်ပြီး၊ အစိုးရဘက်က တာဝန်မကျေရင် နောက်ထပ် အစိုးရအသစ်နဲ့ အစားထိုးပိုင်ခွင့်တောင် ရှိပါတယ်။

ပြည်သူတွေ မပါရင်၊ ပြည်သူတွေက လစ်လျူရှုထားရင် အစိုးရကို လုပ်ချင်သလိုလုပ်ဖို့ ခွင့်ပြုထားသလို ဖြစ်သွားနိုင်ပါတယ်။ အရှင်းဆုံးကတော့ … ပြည်သူက အစိုးရကို ကြိုးဆွဲ တည့်မတ်ပေးရတာသာဖြစ်ပြီး အစိုးရက ပြည်သူကို ကြိုးဆွဲ ထိန်းကျောင်းပေးရတာ မဟုတ်ပါဘူး။

ဥပဒေပြု လွှတ်တော်က ဥပဒေပြုရပါတယ်။ ဒီအတွက် ပြည်သူတွေက လုပ်ပိုင်ခွင့်အာဏာ (Mandate) ပေးထားတာ ဖြစ်ပါတယ်။ လုပ်ပိုင်ခွင့်အာဏာကို ပြည်သူတွေအတွက် မှန်မှန်ကန်ကန် အကျိုးဖြစ်ထွန်းစေအောင် လွှတ်တော်အမတ်တွေကို ပြည်သူတွေက ရွေးချယ်တင်မြှောက်ရတယ်လို့ လူအများ သိနေကြပါတယ်။ ဒါ့အပြင် လိုအပ်သလို ထိန်းကျောင်း တည့်မတ်ပေးရပါသေးတယ်ကိုလည်း သိထားကြရပါမယ်။

စစ်အစိုးရကနေ အရပ်သားအစိုးရကို ပြောင်းလာရုံနဲ့ ဒီမိုကရေစီလို မခေါ်နိုင်သေးပါဘူး။ အာဏာရှင်စနစ် အောက်ကနေ လွတ်မြောက်လာရုံနဲ့လည်း ဒီမိုကရေစီ ပန်းတိုင်ရောက်ပြီလို့ မဆိုနိုင်သေးပါဘူး။ အသွင်ကူးပြောင်းရေးကာလမှာ ကနဦးအနေနဲ့ ရွေးကောက်ပွဲ၊ နိုင်ငံရေးပါတီများ၊ အခြေခံဥပဒေ၊ လွှတ်တော်၊ ရပိုင်ခွင့်များစတဲ့ ဒီမိုကရေစီ အခြေခံတွေ မရှိမဖြစ် လိုအပ်ပါတယ်။ ဒါ့အပြင် လွတ်မြောက်ခြင်း နှစ်ခုနဲ့လည်း ထပ်မံ ပေါင်းစပ်ဖို့ အရေးကြီးပါတယ်။ ပထမလွတ်မြောက်ခြင်းဟာ လူတိုင်း အကြောက်တရားမှ လုံးဝ လွတ်မြောက်ခြင်း ဖြစ်ပြီး ဒုတိယလွတ်မြောက်ခြင်းတော့ အဂတိလိုက်စားမှု၊ အာဏာအလွဲသုံးစားမှုမှ လွတ်မြောက်ခြင်း ဖြစ်ပါတယ်။

လွင်အောင်စိုး

၁၈-၃-၂ဝ၁၂



ဆက်စပ်သတင်း - EMG -

Posted in: ဖြန့်ဝေခြင်း