“Yellow Cat UAV” လေ့ကျင့်ပျံသန်းမှုအား ကာကွယ်ရေးဦးစီးချုပ် (လေ) မှ ကြည့်ရှုစစ်ဆေးစဉ်
သို့ဗိုလ်ချူပ်မှူးကြီးခင်ဗျား
ပြည်ထောင်စုသမ္မတ မြန်မာနိုင်ငံတော် အစိုးရဟာ ပြုပြင်ပြောင်းလဲရေးဆိုပြီး နိုင်ငံတကာနဲ့ ပြည်တွင်း နယ်ပယ်အသီးသီမှာ image တက်အောင် လုပ်ကိုင်ပြနေသော်လည်းပဲ တပ်မတော် အတွင်းမှာတော့ အဲဒီလို ကောင်းသောပြောင်းလဲမှုတွေနဲ့ လားလားမှ မသက်ဆိုင်သလို ရှိနေပါတယ်။ ယခင်ကလို စီးပွားရေးလုပ်ငန်းတွေကို လှည့်လည်စစ်ဆေး အကြောင်းရှာဖို့ မဖြစ်နိုင်တော့တာမို့ နိုင်ရာဖိထောင်းတတ်တဲ့ စစ်အာဏာရှင် ဗိုလ်ချူပ်တွေရဲ့ အမူအကျင့်အတိုင်း တိုင်းစစ်ဌာနချူပ် နယ်မြေအတွင်းက တပ်ရင်းတပ်ဖွဲ့များအား အကြိမ်ကြိမ် လှည့်လည်ရင်း တပ်စစ်နေပါတော့တယ်။
ယောကျာင်္းက တပ်စစ်၊ မိန်းမက စည်းကော်စစ်နေချိန်မှာ တပ်ရင်းတပ်ဖွဲ့များအတွက် ဧည့်ခံစရိတ်ထောင်းပြီး မညှစ်ထုတ်နိုင်တော့လို့ လာစစ်တဲ့ ဗိုလ်ချူပ်တွေကိုလည်း မျက်နှာညိုစေပါတယ်။ အဲဒီဗိုလ်ချူပ်တွေဟာ မည်သည့်ထောက်ပံ့မှုမျိုး၊ ဖြည့်ဆည်းမှုမျိုးမှ မလုပ်ပေးနိုင်ပဲနဲ့ သက်သာဆိုင်၊ ဆံသဆိုင်၊ ရိပ်သာ စတဲ့ အဆောက်အဦးတွေကို အုတ်ကာ၊ သွပ်မိုးဖြစ်ရမယ်လို့ ဇွတ်အတင်း ညွှန်ကြားချက်တွေကြောင့် တပ်မှူးတွေအနေနဲ့ မိမိကိုယ်ပိုင်ငွေနဲ့ စိုက်ထုတ်လုပ်ရမဲ့သဘော ဖြစ်နေပါတယ်။
ယခု လေတပ်ထဲမှာ တိုက်လေယာဉ်များနဲ့ MI - 24 P တိုက်ခိုက်ရေး ရဟတ်ယာဉ်များအား ပုံမှန်မဟုတ်ဘဲ 2011 ခုနှစ် ဒီဇင်ဘာလမှစပြီး စစ်ဆင်ရေး stand by အသင့်အနေအထား လုပ်ခိုင်းနေလို့ လေသူရဲများဟာ စိတ်ပျက် ညီးညူနေကြပါတယ်။ မကြာသေးမှီကလေးကမှ လေတပ်က အရာရှိတချို့ကို ကာကွယ်ရေးဦးစီးချူပ် (လေ) ဗိုလ်ချူပ်ကြီးမြတ်ဟိန်းဟာ အင်တာနက် သတင်း စာမျက်နှာတွေပေါ်မှာ ရေးသားမှုနဲ့ ပြင်းထန်စွာ အရေးယူတဲ့အပေါ် ဗိုလ်ချူပ်မှူးကြီးအနေနဲ့ သက်ညှာစွာ ပြန်လည် စဉ်းစားပေးသင့်ပါတယ်။
လေတပ်ရှိ အရာရှိစစ်သည် အများစုဟာ မြို့ကြီးပြကြီးများနဲ့ လူထုကို ထိတွေ့ဆက်ဆံမူ ပိုမို ရရှိတာနဲ့အမျှ ပညာထူးချွန်သူများ ဖြစ်နေတာကြောင့် အင်တာနက် သုံးစွဲနိုင်သူ များပြားပြီး သုံးစွဲနိုင်တဲ့ အခွင့်အလမ်းလည်း ပိုရှိပါတယ်။ အတွေးအခေါ်ပိုင်းဆိုင်ရာမှာ မှန်ကန်သင့်မြတ်ပြီး နိုင်ငံတစ်ခုမှာ မရှိမဖြစ်တဲ့ တပ်မတော်ကို ဂုဏ်ကျက်သရေ ရှိစေချင်သူများ ဖြစ်ကြပါတယ်။ ပြုပြင်ပြောင်းလဲရေးကို တပ်တွင်းအောက်ခြေကအစ နိုင်သလောက် လုပ်ရမှာ နိုင်ငံခေါင်းဆောင်တွေ အနေနဲ့ သိပါလိမ့်မယ်။ ဒါကြောင့် အဲဒီလေတပ် အရာရှိသုံးဦးကို ပစ်မှတ်မထားသင့်ဘဲ တပ်တွင်း သက်သာချောင်ချိရေးကိုသာ အမှန်တကယ် ထိထိရောက်ရောက် ပြုလုပ်ပေးသင့်ပါတယ်။
မတရားမှုတွေကိုလည်း တပ်အတွင်းမှာ ကိန်းအောင်းခွင့် မပေးသင့်တော့ဘူးလို့ ယုံကြည်ပါတယ်။ ဗိုလ်ချူပ်မှူးကြီးတို့ အထက်အကြီးအကဲများ ဖြစ်ကြတဲ့ လက်ရှိအစိုးရက ဒီမိုကရေစီ အနှစ်သာရများ ပီပြင်လာစေဖို့ သက်သေပြတဲ့ အနေနဲ့ မီဒီယာများတွင် လွတ်လပ်စွာ တင်ပြနိုင်တဲ့ အခွင့်အရေးများ ပေးနေပြီဖြစ်သလို လက်နက်ကိုင် ယှဉ်တိုက်ခဲ့တဲ့ ရန်သူများကိုပင် ငြိမ်းချမ်းရေး ဆွေးနွေးပွဲများ လုပ်ပေးခဲ့ပြီ ဖြစ်ပါတယ်။ အမှန်တရားကို ရင်ဖွင့်တဲ့ အဲဒီအရာရှိတွေကို နှိပ်ကွပ်ရုံနဲ့ ရပ်တန့်ကြောက်ရွံ့သွားကြမှာ မဟုတ်ဘဲ တပ်မတော်သား အများစုဟာ ပိုမိုကရုဏာသက်လာပြီး ရင်ထဲကဆန္ဒများအား ဆက်လက်ဖေါ်ထုတ်ဖို့ ကြိုးစားသွားကြမှာ ဧကန်မုချ ဖြစ်ပါတယ်။
ဗိုလ်ချူပ်မှူးကြီးအား တစ်ခုထဲ ပြောလိုသည်မှာ စစ်တပ်တွင် ဒီမိုကရေစီပေးလို့ မရသည်မှာ အတိုင်းအတာတစ်ခုအထိ မှန်သော်လည်း တပ်တိုင်းပြုလုပ်နေကြ ဆန္ဒဖေါ်ထုတ်ပွဲ (ဒါဘာ) တွေဆိုတာ စစ်မှန်မှုရှိရဲ့လား ဘာအနှစ်သာရလဲလို့ မေးချင်ပါတယ်။ အဖြေပေးစေလိုပါတယ်။ ရဲဘော်တွေရဲ့ ပါးစပ်ဖျားမှာ ဒါပါဘဲကွာလို့ စိတ်ပျက်ညီးညူသံတွေကို ပျောက်အောင် မလုပ်သရွေ့ တပ်မတော်အင်အားရှိဖို့ တိုင်းပြည်အင်အားရှိဖို့ မဖြစ်နိုင်သေးသလို အင်တာနက် စာမျက်နှာတွေပေါ်မှာလည်း ဖြစ်ရပ်မှန်များ ပျောက်ကွယ်ဆိတ်သုန်းသွားမှာ မဟုတ်ပါကြောင်း လေးလေးနက်နက် တင်ပြလိုက်ရပါတယ်။
0 comments:
Post a Comment