မြန်မာနိုင်ငံတွင် ကိုယ်စားလှယ်ရုံး ဖွင့်လှစ်ထားသော စင်ကာပူအခြေစိုက် UOB ဘဏ်၏ မလေးရှားနိုင်ငံရှိ ဘဏ်ခွဲတစ်ခုကို တွေ့ရစဉ်
မြန်မာနိုင်ငံမှ ပုဂ္ဂလိကဘဏ်များ၊ အစိုးရပုဂ္ဂလိက ဖက်စပ်ဘဏ် ၁၁ဘဏ်သည် နိုင်ငံခြားဘဏ် လုပ်ငန်းကို လုပ်ကိုင်ခွင့်ရရှိထားပြီး အဆိုပါလုပ်ငန်းကို နိုင်ငံတကာအဆင့်မီ လည်ပတ်နိုင်ပြီးမှသာ ကိုယ်စားလှယ် ရုံးအဖြစ် ဖွင့်လှစ်ထားသော နိုင်ငံခြား ဘဏ်များအနေဖြင့် ဘဏ်ခွဲအဖြစ် မြန်မာနိုင်ငံတွင် တည်ထောင်လုပ်ကိုင် ခွင့်ရမည်ဖြစ်ကြောင်း ဘဏ်လုပ်ငန်း အသိုင်းအ၀ိုင်းမှ သတင်းရရှိသည်။
“အခုပြည်တွင်းဘဏ်တွေ လုပ် ကိုင်ခွင့်တိုးပြီးရလာတယ်။ အရင်က ရခဲ့ဖူးတဲ့ နိုင်ငံခြားငွေ လွတ်လပ်စွာ ရောင်းဝယ်ဖောက်ကားခွင့်၊ နိုင်ငံခြားဘဏ်လုပ်ငန်း လုပ်ကိုင်ခွင့်၊ အကြွေးဝယ်ကတ်တွေ ထုတ်ဝေခွင့်၊ ရွှေနဲ့စိန်အပေါင်လက်ခံပြီး ငွေထုတ်ချေးခွင့် စတာတွေကို လုပ်ကိုင်ခွင့်ရ လာပါပြီ။ မြန်မာနိုင်ငံအနေနဲ့လည်း ဘဏ်နဲ့ဘဏ်လုပ်ငန်းတွေ နိုင်ငံတကာ အဆင့်လုပ်နိုင်ဖို့ အရေးကြီးနေတာကြောင့် ဒီလိုလုပ်ကိုင်ခွင့်တွေပြန်ပေး တယ်လို့ယူဆတယ်။ နိုင်ငံခြားဘဏ် လုပ်ငန်းအနေနဲ့ ပြောရရင် အရင်လို အစိုးရဘဏ်နှစ်ခု၊ သုံးခုကလုပ်တာ မျိုးမဟုတ်တော့ဘဲ ပြည်တွင်းဘဏ်တွေ လုပ်ခွင့်ရလာတယ်။ ဒါပေမယ့် ၂၀၁၂ မတ်လလောက်မှ နိုင်ငံခြား ဘဏ်လုပ်ငန်းစလုပ်နိုင်မယ်လို့ ထင်တယ်။ ဥပမာ အယ်လ်စီ(ငွေလွှဲစာ တမ်း)ဖွင့်တာမျိုးပေါ့။ လောလောဆယ်ကတော့ ပြည်တွင်းစာရင်း အလွှဲအပြောင်းတွေနဲ့ အပ်ငွေလက်ခံတာလောက်ပဲ လုပ်နိုင်မယ်။ ပြည်တွင်းဘဏ်တွေ အဆင့်မီမီလည်ပတ် နိုင်ပြီဆိုရင်၊ ယှဉ်ပြိုင်နိုင်စွမ်း ပြည့်မီပြီဆိုရင် နိုင်ငံခြားဘဏ်ခွဲတွေ တည်ထောင်ခွင့်ပြုသွားမယ်လို့ သိရပါတယ်”ဟု နိုင်ငံခြားဘဏ်လုပ်ငန်း လုပ်ကိုင်ခွင့်ရရှိသော ပုဂ္ဂလိကဘဏ် တစ်ခုမှ တာဝန်ရှိသူတစ်ဦးက ပြော ကြားပါသည်။
နိုင်ငံခြားဘဏ်လုပ်ငန်း လုပ်ကိုင်မည့် ပြည်တွင်းဘဏ်များအနေဖြင့် အတွေ့အကြုံအားဖြင့်သော် လည်း ကောင်း၊ နည်းပညာအရ သော်လည်းကောင်း ယှဉ်ပြိုင်နိုင်စွမ်းလိုအပ်ချက် ဖြစ်ပေါ်နေသောကြောင့် နိုင်ငံခြား ဘဏ်များကို ကိုယ်စားလှယ်ရုံးအဖြစ်သာ ဖွင့်လှစ်ခွင့်ပေးနေခြင်းဖြစ်ကြောင်း၊ အဓိကအချက်မှာ နိုင်ငံတော်၏ စီးပွားရေး ဦးတည်ချက် တစ်ရပ်ဖြစ်သော ‘နိုင်ငံတော်၏ စီးပွားရေးတစ်ရပ်လုံးကို ဖန်တီးနိုင်မှုစွမ်းအားသည် နိုင်ငံတော်နှင့် တိုင်းရင်းသားပြည်သူတို့ လက်ဝယ်တွင်ရှိရေး’ ဆိုသည်နှင့်အညီ ပြည်တွင်းဘဏ်များ၏ လုပ်ရည်ကိုင်ရည်ပြည့်ဝမှသာ နိုင်ငံခြားဘဏ်များ အနေဖြင့် မြန်မာနိုင်ငံတွင် ဘဏ်ခွဲ တည်ထောင်ခွင့်ရမည် ဖြစ်ကြောင်း တာဝန်ရှိသူများ၏ ထုတ်ပြန် ပြောကြားမှုများအရ သိရပါသည်။
“ဘဏ်ကိုယ်စားလှယ်ရုံး ဖွင့်လှစ်ထားတာကြာပါပြီ။ ၁၉၉၀ ကျော် ကတည်းကပါ။ အခုထိလည်း ဖွင့်လှစ်ထားပါတယ်။ မြန်မာပြည်က အနာဂတ်အရ ဆက်ဖွင့်ထားဦး မှာပါ။ လောလောဆယ် ဘဏ်ကိုယ်စားလှယ်ရုံးတွေထက် အာမခံကိုယ်စားလှယ်ရုံးတွေက ပိုအလုပ်ဖြစ်လာတယ်။ လုပ်ငန်းလုပ်ကိုင်ခွင့် ရတဲ့အထိ စောင့်ရဦးမှာပေါ့”ဟု နိုင်ငံခြားဘဏ်လုပ်ငန်းတစ်ခု၏ တာဝန်ခံတစ်ဦးက ရှင်းပြပါသည်။
လက်ရှိလုပ်ကိုင်နေသော နိုင်ငံခြားဘဏ် ကိုယ်စားလှယ်ရုံးများ၏ လုပ်ငန်းတာဝန်များမှာ ဘဏ်လုပ်ငန်း နှင့် ငွေရေးကြေးရေးဆိုင်ရာ သတင်း အချက်အလက်များ ကောက်ယူ စုဆောင်းခြင်း၊ ဥပဒေ၊ စည်းမျဉ်း စည်းကမ်းထုတ်ပြန်ခြင်း၊ ပြောင်းလဲခြင်း၊ ပယ်ဖျက်ခြင်း၊ ပြဋ္ဌာန်းခြင်း များစသည်တို့နှင့် စပ်လျဉ်း၍ ရုံးချုပ်ထံ အစီရင်ခံတင်ပြခြင်း၊ ပင်ရင်းနိုင်ငံမှ လုပ်ငန်းများအတွက် ပံ့ပိုးပေးခြင်း၊ အစိုးရနှင့်လုပ်ငန်းအကြား ချိတ်ဆက် ညှိနှိုင်းပေးခြင်း စသည်တို့ ပါဝင်ကြောင်း သိရပါသည်။
မြန်မာနိုင်ငံတွင် နိုင်ငံခြားဘဏ် ကိုယ်စားလှယ်ရုံးခွဲ ဖွင့်လှစ်မှုမှာ ၁၉၉၇ ခုနှစ် အာရှစီးပွားရေးအကျပ် အတည်းမတိုင်မီအထိ ၄၉ ဘဏ် လာရောက်ဖွင့်လှစ်ခဲ့ပြီး အာရှစီးပွားရေး အကျပ်အတည်းပြီး နောက်ပိုင်း နှင့် ၂၀၀၃ ခုနှစ်ပိတ်ဆို့မှု ဖြစ်စဉ်များကြောင့် ဘဏ်အများအပြား ပြန်လည် ထွက်ခွာသွားကာ ၂၀၁၁ ခုနှစ် မတ်လ ၃၁ ရက်နေ့ စာရင်းအရ ဘဏ်ကိုယ်စားလှယ်ရုံး ၁၄ ရုံးသာ ကျန်ခဲ့သည်။ အခြားတစ်ဖက်တွင်လည်း ဘဏ်လုပ်ငန်းပြုပြင်ပြောင်းလဲမှုများ ဆောင်ရွက်နိုင်သည်ဟု နိုင်ငံခြားဘဏ်များက မျှော်မှန်းလျက် ရှိကြောင်း သိရပြီး ယခု ၂၀၁၁ ခုနှစ် နှစ်မကုန်ဆုံးမီတွင် ကိုယ်စားလှယ်ရုံး ဖွင့်လှစ်ထားသော နိုင်ငံခြားဘဏ်မှာ ၃၀ကျော် အထိရှိလာပြီဖြစ်ကြောင်း သိရသည်။
ELEVEN MEDIA GROUP
0 comments:
Post a Comment