ပြည်ပမှ တင်သွင်းလာသည့် စားသုံးဆီများအတွင်း ပင်လယ်ရေများ ရောထားကြောင်း မြန်မာနိုင်ငံ အစားအသောက်နှင့်ဆေးဝါးကွပ်ကဲရေးဌာန FDA မှ စစ်ဆေးချက် အရတွေ့ရှိရကြောင်း စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီး ဦးဝင်းမြင့်က ဒီဇင်ဘာလ ၁၁ ရက်နေ့က ကျင်းပ သည့် လုပ်ငန်းရှင်များနှင့် တွေ့ဆုံပွဲတွင် ပြောကြားခဲ့ပါသည်။
တွေ့ဆုံပွဲတွင် ပြည်ထောင်စုဝန်ကြီးက”ဆီနဲ့ပတ်သက်လို့ တင်သွင်းလာတဲ့ဆီတွေကို FDA ကစစ်ရတယ်။ စစ်လိုက်တော့ ဆီထဲမှာ ပင်လယ်ရေတွေ ရောထားတာတွေ့ရတယ်။ သင်္ဘောကဆီကိုခိုးပြီး ဆီထဲကို ပင်လယ်ရေပြန်ထည့်တာ။ ဆီက အနံ့တွေ ထွက်နေတယ်။ ကျောက်တန်းဘက်မှာ ဆီသွားဝယ်ရင် တစ်ပိဿာကို ကျပ် ၁၁၀၀ လောက်ပဲ ရှိတယ်။ အရင်းက တကယ်ဆို ကျပ် ၁၆၀၀ လောက်ရှိတာလေ။ ဒီလို မမှန်မကန်တွေလည်း ရှိတယ်”ဟု ပြောကြားခဲ့ပါသည်။
မြန်မာနိုင်ငံဆီနှင့်ဆီ လုပ်ငန်းရှင်များအသင်း တာဝန်ရှိသူတစ်ဦးကလည်း ”ဆီတင်လာတဲ့ သင်္ဘောက ရန်ကုန်ဆိပ်ကမ်းကို မကပ်ခင် ပင်လယ်ဝမှာ ရပ်ထားပြီး စောင့်ဆိုင်းရသေးတယ်။ သင်္ဘောကပဲ ပြန်ခိုးတာ။ သင်္ဘောပေါ်မှာ ဖြစ်တဲ့အတွက် သင်္ဘောလိုင်းက တာဝန်ယူရမှာပေါ့။ သင်္ဘောလိုင်းကိုလည်း ပြောထားပြီးပြီ။ ဆီကို အပြင်ရောင်းပြီး သင်္ဘောပေါ်ကဆီထဲကို ရေပြန်ထည့်ထားတဲ့ သဘောဖြစ်နေတယ်” ဟု ပြောကြားခဲ့ပါသည်။
သွင်းကုန်လုပ်ငန်းရှင် တစ်ဦးကလည်း “ဒီဈေးကွက်ဖြစ်နေတာတော့ မကောင်းဘူး။ သင်္ဘောက ခိုးပြီးထုတ် ပြန်ရောင်းလုပ်တာ။ သေချာတာကတော့ သင်္ဘောပေါ်ကို အပြင်လူတက်ခိုးဖို့ဆိုတာ လုံးဝမဖြစ်နိုင်ဘူး။ အခုပုံစံအရ ဆိုရင် သွင်းကုန်လုပ်တဲ့သူတွေ သတိထားရတော့မယ်။ ဒါက များသွားလို့၊ ဆီက အနံ့ထွက်လို့၊ စစ်ဆေးကြည့်လို့ သိရတာ။ ကောင်းပါတယ်။ ပင်လယ်ဝမှာ ဒါမျိုးဈေးကွက်ဖြစ်နေ တာ လုပ်ငန်းရှင်တွေ သတိထားဖို့ အတွက် သိသွားတာပေါ့”ဟု ပြောပြခဲ့သည်။ ယခု၂၀၁၁-၂၀၁၂ဘဏ္ဍာ နှစ်တွင်သွင်းကုန် ကဏ္ဍ၌ စားအုန်းဆီတင်သွင်းမှုမှာ အများဆုံးတင်သွင်းသည့် ကုန်စည်သုံးမျိုးအတွင်း ပါဝင်နေကြောင်းလည်း သိရသည်။
0 comments:
Post a Comment