ဧရာဝတီတိုင်းဒေသကြီး၊ သာပေါင်းမြို့နယ်၊ ဇီးဖြူကွင်းရွာတွင် င၀န်မြစ်တိုက်စားသဖြင့် ကမ်းပါးပြိုကျမှုကြောင့် တစ်ရွာလုံးရွှေ့ပြောင်း ရမည့်အခြေအနေရှိနေသည်ဟု ဒေသခံအာဏာပိုင်အဖွဲ့အစည်းများက ပြောသည်။
ယခုလ ၆ ရက်မှစတင်ကာ မြစ်ကမ်းစပ်တစ်လျှောက် အက်ကြောင်းကြီးများဖြစ်ပေါ်ခဲ့ပြီး မြစ်ကမ်းပါးအရှည် ပေ ၆၈၀ ကျော်ခန့်နှင့် အကျယ် ၁၁၄ ပေခန့် င၀န်မြစ်ထဲသို့ ပြိုကျခဲ့သည်။
ကျေးရွာတွင် အိမ်ခြေ စုစုပေါင်း ၇၂ လုံးရှိပြီး အန္တရာယ်ရှိနိုင်သောအိမ်ခြေ ၄၆ လုံးကို ယခုလ ၁၆ ရက်နေ့ကတည်းက ဖယ်ရှားပေးခဲ့ပြီးဖြစ်ကြောင်း ဇီးဖြူကွင်းကျေးရွာအုပ်ချုပ်ရေးမှူး ဦးဝင်းမောင်ကပြောသည်။
အရေးပေါ်အခြေအနေတွင် စာသင်ကျောင်းနှင့် ဘုန်းကြီးကျောင်းများတွင် နေထိုင်နိုင်စေရန် စီစဉ်ထားကြောင်း ၎င်းက ဆက်လက် ရှင်းပြသည်။
"အခုဖြစ်တာက ၀ုန်းကနဲပြိုကျတာမဟုတ်ဘူး။ တအိအိပဲကျတာ။ တစ်နေ့တစ်ခြား အက်ကြောင်းကြီးတွေများလာတယ်" ဟု ရွာသားတစ်ဦးကပြောပြသည်။
ကမ်းစပ်မှစတင်ကာ ကျေးရွာအတွင်းထဲထိ မြေကြီးပေါ်တွင် အက်ကြောင်းကြီးများဖြစ်ပေါ်နေကာ အကျဉ်းဆုံးနေရာတွင် ၆ ပေခန့် နှင့်အကျယ်ဆုံး ၁၀ ပေခန့် ရှိနေပြီဖြစ်သည်။
သဘာဝဘေးဒဏ်ရင်ဆိုင်နေရသောမိသားစုများ ပြန်လည်ထူထောင်ရန်အတွက် တစ်အိမ်ထောင်လျှင်ကျပ် နှစ်သိန်းနှုန်းဖြင့် World Vision မှ ထောက်ပံ့ပေးသွားရန်စီစဉ်လျှက်ရှိကြောင်းနှင့် အိမ်ခြေမည်မျှပေးရမည်ကို လေလောဆယ်တွင်မသိနိုင်သေးကြောင်း World Vision မှတာဝန်ရှိသူတစ်ဦးကပြောသည်။
ကမ်းပါးပြိုကျရာသို့ တိုင်းအဆင့်ဌာနဆိုင်ရာအကြီးအကဲများ လာရောက်ကြည့်ရှုလေ့လာခဲ့ပြီး ကျေးရွာအဆင့် သဘာဝဘေးအန္တရာယ် ပြန်လည်ထူထောင်ရေးကော်မတီဖွဲ့စည်းပေးခဲ့ပြီးဖြစ်ကြောင်း ဇီးဖြူကွင်းကျေးရွာအုပ်ချုပ်ရေးမှူး ကပြောသည်။
၎င်းကျေးရွာတွင် ၂၀၀၄ ခုနှစ်က ဤကဲ့သို့တစ်ကြိမ်ဖြစ်ခဲ့ပြီး ကမ်းနားရှိအိမ် လေးလုံးနှင့် ကမ်းနဖူးရှိ သစ်ပင်ကြီးပြိုလဲကျခဲ့ကြောင်း၊ ယခုတစ်ကြိမ်တွင်တော့ အဆိုးဆုံးဖြစ်ကြောင်း ဒေသခံရွာသားများက ပြောသည်။
Yangon Press International
0 comments:
Post a Comment