မြန်မာနိုင်ငံ ရုပ်ရှင်အစည်းအရုံး၏ အမှုဆောင် အဖွဲ့ဝင်များအား မဲပေးစနစ်ဖြင့် အသစ်ပြန်လည် ရွေးချယ်ဖွဲ့စည်းမည်

မြန်မာနိုင်ငံ ရုပ်ရှင်အစည်းအရုံး၏ အမှုဆောင်အဖွဲ့ဝင်များအား မဲပေးစနစ်ဖြင့် အသစ်ပြန်လည် ရွေးချယ် ဖွဲ့စည်းသွားမည်ဖြစ်ကြောင်း သိရှိပါသည်။

မြန်မာနိုင်ငံရုပ်ရှင် အစည်းအရုံး၌ လက်ရှိတာဝန် ထမ်းဆောင်နေကြသူများမှာ ဒုတိယသက်တမ်း ကျော်လွန်နေပြီဖြစ်သည့်အပြင် အနုပညာရှင်များကလည်း အသစ်တစ်ဖန်ပြန်လည် ရွေးချယ်ပေးပါရန် တင်ပြလာခြင်း တို့ကြောင့်ဖြစ်ကြောင်းသိရသည်။

“ရုပ်ရှင်အစည်းအရုံး အမှုဆောင်တွေရဲ့ ဒုတိယသက်တမ်းက အခုဆို တော်တော်လေး ကျော်လွန်နေပါပြီ။ ဒါကြောင့် တခြားသော လုပ်ကိုင်လိုသူ လုပ်ကိုင်နိုင်သူတွေကို ပြန်လည်ရွေးချယ်သွားဖို့ စီစဉ်ပေးသွားမှာပါ။ ရုပ်ရှင်အစည်းအရုံးရဲ့ လက်ရှိအမှုဆောင်ကာလမှာ ရရှိထားတဲ့ ဘဏ္ဍာငွေစာရင်း အားလုံးနဲ့ ဆောင်ရွက်ဖို့ရှိတဲ့ ကိစ္စရပ်တွေကို ပြန်လည်လွှဲပြောင်း ပေးအပ်သွားဖို့ စီစဉ်ထားပါတယ်”ဟု ရုပ်ရှင်အစည်းအရုံး ဥက္ကဋ္ဌ ဦးမြင့်သိန်းဖေက ဆင်ဆာမူဝါဒ လျှော့ချပေးခဲ့သည့် အစည်းအဝေးတွင် ရှင်းလင်းပြောဆို ခဲ့ပါသည်။

နိုဝင်ဘာလ ၁၆ ရက်နေ့က ပြုလုပ်ခဲ့သည့် ဆင်ဆာမူဝါဒဆိုင်ရာ အလုပ်ရုံဆွေးနွေးပွဲတွင် အနုပညာရှင်များက ရုပ်ရှင်အစည်းအရုံး ပြန်လည်ဖွဲ့စည်းရန် တင်ပြခဲ့ခြင်းဖြစ်ပြီး ရုပ်ရှင်အစည်းအရုံးသည် NGO အဖွဲ့အစည်းတစ်ခု ဖြစ်သော်လည်း ရုပ်ရှင်လောကသားများ၏ အကျိုးအတွက် ကိုယ်စားပြုဆောင်ရွက်နိုင်သည့် အဖွဲ့အစည်းတစ်ရပ် ဖြစ်ရန်လိုအပ်ကြောင်း၊ အဖွဲ့ဝင်များသည်လည်း မိမိကိုယ်ကျိုးထက် ရုပ်ရှင်လောကသားများ၏ အကျိုးကိုရှေ့ရှု ဆောင်ရွက်သွားမည့်သူကို ရွေးချယ်တင်မြှောက် လိုကြောင်း တင်ပြခဲ့ခြင်းဖြစ်သည်။

လက်ရှိဆောင်ရွက်လျက်ရှိသည့် ရုပ်ရှင်အစည်းအရုံးအနေဖြင့် လုပ်ဆောင်ခဲ့သည့် သက်တမ်းကာလအတွင်း ဘဏ္ဍာငွေကျပ် သိန်းကိုးထောင်ကျော်အထိ ရရှိနိုင်ရန် ရှာဖွေထားခဲ့သည်ဟု သိရသည်။

Posted in: ပြည်တွင်းသတင်း