ယနေ့နံနက် ၉နာရီ ၄၅ မိနစ်မှ စ၍ တောင်ဒဂုံ ၇၀ ရပ်ကွက်အနီး၌ လူ့အခွင့်အရေး လှုပ်ရှားသူ ဦးစိုးကြွယ် တောင်းဆိုချက် ၆ ချက်ကို ဗီနိုင်းတွင်ရေးသား ကိုင်ဆောင်ကာ တကိုယ်တော် ဆန္ဒပြခဲ့သည်။
၁၅ မိနစ်ကြာ လမ်းလျှောက် ဆန္ဒပြပြီးနောက် လုံခြုံရေးနှင့် ရဲတပ်ဖွဲ့ဝင်များက ဦးစိုးကြွယ်အား ကားဖြင့်ခေါ်ဆောင်သွားကြောင်း မျက်မြင်တွေ့လိုက်ရသူ တဦးက YPI သို့ပြောသည်။
“ သူ့ကို ဆွဲတင်တော့ ဦးစိုးကြွယ်က ဆွဲမတင်နဲ့ ဂုဏ်သိက္ခာရှိရှိ လိ်ုက်မယ်ပြောပြီး လိုက်သွားတယ်၊ ခေါ်သွားတာတောင် တောင်းဆိုချက် ၆ ချက်ပါတဲ့ ဗီနိုင်းကို ကိုင်လျှက်သားပဲ” ၎င်းမျက်မြင်တွေ့သူက ပြောပြသည်။
တောင်းဆိုချက် ၆ ချက်မှာ ကွန်ကရစ်လမ်းများ ခင်းပေးရေး၊ မီတာထိန်းသိမ်းခ နှင့် မီတာခ လျှော့ချရေး၊ ရေမော်တာမှရေ ပုံမှန်ရရှိရေး၊ အစိုးရ၀န်ထမ်းများ အကျင့်ပျက်မှု အရေးယူပေးရေး၊ ၂၄ နာရီမီးပုံမှန်ရရှိရေးနှင့် အစိုးရ၀န်ထမ်းများ၏ အခက်အခဲကို တာဝန်ယူဖြေရှင်းပေးရေး တို့ဖြစ်သည်။
ဦးစိုးကြွယ်နှင့် အခြားနိုင်ငံရေး လှုပ်ရှားသူတို့မှာ ယခုလ ၄ ရက်နေ့က ငြိမ်းချမ်းစွာစုဝေး စီတန်းခွင့် သက်ဆိုင်ရာတွင် လျှောက်ထားခဲ့သော်လည်း ချပေးခြင်းမရှိသဖြင့် ယခုကဲ့သို့ တကိုယ်တော် ဆန္ဒပြခြင်းဖြစ်သည်ဟု နိုင်ငံရေးလှုပ်ရှားသူတဦးက ပြောသည်။
ဦးစိုးကြွယ်မှာ ၂၀၀၇ ကုန်ဈေးနှုန်းကျဆင်းရေး လှုပ်ရှားမှုဖြင့် ထောင်ဒဏ် ၂ နှစ်အပြစ်ပေးခံရဖူးကာ နောက်ပိုင်း လူ့အခွင့်အရေး ဆိုင်ရာ ကလေးစစ်သားပပျောက်ရေး ကိစ္စရပ်များကို ကူညီဆောင်ရွက်ပေး နေသူတဦးဖြစ်သည်။ ၎င်းသည် တောင်ဒဂုံမြို့နယ်တွင် နေထိုင်သူတဦးဖြစ်သည်။ ။
0 comments:
Post a Comment