မြန်မာပြည် ဟစ်ပ်ဟော့ပ် ရေစီးကြောင်း ပထမ မျိုးဆက်များဖြစ်သော ကိုဇေယျာသော်(၀ဲဘက်)နှင့် ရန်ရန်ချန်း၊ အနဂ္ဂတို့ကို မကြာသေးမီက ဒေါ်အောင်ဆန်းစုကြည်နှင့် အတူတွေ့ရစဉ်(ဓာတ်ပုံ - ဇေယျာသော် Facebook fan page)
နိုင်ငံရေး အကျဉ်းသားဟောင်း လူငယ် ဟစ်ပ်ဟော့ပ် အဆိုတော် ကိုဇေယျာသော်သည် အမျိုးသား ဒီမိုကရေစီ အဖွဲ့ချုပ် (NLD)ကို ကိုယ်စားပြု၍ လာမည့် ဧပြီ ၁ ရက်နေ့ကျင်းပမည့် ကြားဖြတ်ရွေးကောက်ပွဲတွင် ၀င်ရောက် ရွေးချယ်ခံမည် ဖြစ်သည်။
“ကျနော်က နေပြည်တော် ပုဗ္ဗသီရိမြို့နယ်က ၀င်ရောက်ရွေးချယ်ခံမှာပါ”ဟု ကိုဇေယျာသော်က ဧရာဝတီကို ပြောသည်။
ပုဗ္ဗသီရိမြို့နယ်သည် ၂၀၁၀ ရွေးကောက်ပွဲတွင် ယခု သမ္မတ ဦးသိန်းစိန် ၀င်ရောက်အရွေးချယ်ခံခဲ့သော မဲဆန္ဒနယ်မြေဖြစ်သည်။
ထို့အပြင် လွန်ခဲ့သည့် ဇန်န၀ါရီ ၁၂ ရက်နေ့ လွတ်ငြိမ်းချမ်းသာခွင့်ဖြင့် မြောင်းမြအကျဉ်းထောင်က လွတ်မြောက်လာခဲ့ သော မစန္ဒာမင်း က နေပြည်တော် ဇဗ္ဗူသီရိမြို့နယ်၊ မန္တလေး အိုးဖိုအကျဉ်းထောင်မှပြန်လည် လွတ်မြောက်လာသူ မိုးကုတ်မြို့က ကိုမင်းသူက ဥတ္တရ သီရိမြို့နယ်၊ နိုင်ငံရေးအကျဉ်းသားဟောင်း ကိုနိုင်ငံလင်းက ဒက္ခိဏ သီရိ မြို့နယ်တို့က NLD ပါတီ ကိုယ် စားပြု ၀င်ရောက်ယှဉ်ပြိုင်ကြမည် ဖြစ်ကြောင်း သိရသည်။
ကြားဖြတ် ရွေးကောက်ပွဲတွင် NLD ကိုယ်စား ၀င်ရောက်ယှဉ်ပြိုင်မည့် ထိုလူငယ် ၄ ဦး၏ အမည်စာရင်းကို ကြေညာချက်အမှတ် ၆ -၀၁/ ၁၂ ဖြင့် NLD က ယနေ့ ထုတ်ပြန်ထားသည်။
“ကျနော့်အနေနဲ့ကတော့ အတတ်နိုင်ဆုံး အကောင်းဆုံးဖြစ်အောင်ကြိုးစားမှာပါပဲ။ အောင်မြင်ခြင်း၊ မအောင်မြင်ခြင်း ဆိုတာ ကတော့ ဧပြီ ၁ ရက်နောက်ပိုင်းမှ သိရမှာပါ”ဟု ကိုဇေယျာသော်က ဆိုသည်။
ကျင်းမည့် ကြားဖြတ်ရွေးကောက်ပွဲသည် တရားမျှတပြီးလွတ်လပ်သည့် ရွေးကောက်ပွဲဖြစ်ရေးအတွက် အားလုံးတွင်တာဝန်ရှိ သောကြောင့် ၀ိုင်းဝန်း လုပ်ဆောင်သွားကြရမည်ဖြစ်သည်ဟုလည်း သူက ဆိုသည်။
ကိုဇေယျာသော်သည် သမ္မတ ဦးသိန်းစိန်၏ ၁ နှစ် လျှော့ပေါ့ လွတ်ငြိမ်းချမ်းသာခွင့် အမိန့်ဖြင့် ယမန်နှစ် မေလက တနင်္သာရီ တိုင်း ကော့သောင်း အကျဉ်းထောင်မှ လွတ်မြောက်လာသူ ဖြစ်သည်။
အသက် ၃၂ နှစ်အရွယ်ရှိ ကိုဇေယျာသော် အား အာဏာပိုင်များက နိုင်ငံခြားငွေ ကိုင်ဆောင်မှု ပုဒ်မ ၂၄/၁ အရ ထောင်ဒဏ် ၁ နှစ်၊ တရားမဝင် အသင်းဖွဲ့စည်းမှု ပုဒ်မ ၆/၈၈ ဖြင့် ၅ နှစ် စုစုပေါင်းထောင်ဒဏ် ၆ နှစ်ကို ၂ဝဝ၈ ခုနှစ် နိုဝင်ဘာလ၂ဝ ရက် နေ့ က စွဲဆိုချမှတ်ခဲ့ခြင်းဖြစ်သည်။ ၎င်းမှာ အကျဉ်းထောင်တွင်း၌ ၃ နှစ် နေခဲ့ရပြီး နောက် ပြန်လည်လွတ်မြောက်လာခဲ့သည်။
ကိုဇေယျာသော်သည် ယခင်က မြေအောက် လူငယ်ဂီတအဖွဲ့တခုဖြစ်သည့် မျိုးဆက်သစ်လူငယ်များ အစည်းအရုံး(GW)ခေါင်း ဆောင်တဦးလည်း ဖြစ်သည်။
ဧရာဝတီ
0 comments:
Post a Comment