မင်္ဂလာတောင်ညွန့်မြို့နယ် NLD ရုံးဖွင့်ပွဲတွင် ဒေါ်အောင်ဆန်းစုကြည်နှင့် မြို့နယ်ကိုယ်စားလှယ် ဒေါ်ဖြူဖြူသင်းကို တွေ့ရစဉ် (ဓာတ်ပုံ - မြတ်မိုး)
အမျိုးသား ဒီမိုကရေစီ အဖွဲ့ချုပ် (NLD) ၏ မင်္ဂလာတောင်ညွန့် မြို့နယ်ရုံး ဖွင့်ပွဲတွင် မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် က လူတယောက်တည်းပင်ဖြစ်သော်လည်း စိတ်ဆန္ဒရှိပါက တိုင်းပြည်တပြည်ကို လှုပ်ရှားအောင် လုပ်ဆောင်နိုင်သည်ဟု ပြောသွားသည်။
“အခု ရွေးကောက်ပွဲမှာ ဆိုရင် လစ်လပ်တဲ့နေရာက ၄၈ နေရာပဲရှိပါတယ်။ တချို့ကတော့ ပြောမှာပေါ့၊ လွှတ်တော်ထဲမှာ ၄၈ ယောက်တည်းနဲ့ ဘာလုပ်နိုင်မှာမို့လို့လဲလို့ မေးတဲ့သူတွေရှိတယ်။ ကျမကတော့ ယုံကြည်ချက်ရှိတယ်။ တကယ် စိတ်ဆန္ဒ ရှိလို့ရှိရင် လူတယောက်တောင်မှ တိုင်းပြည်တပြည်ကို လှုပ်ရှားအောင် လုပ်နိုင်တယ်” ဟု ၎င်းက ဆိုသည်။
မြို့နယ်တခုအတွက် ကိုယ်စားလှယ်ကို အဘယ်ကြောင့်ရွေးသည်၊ မည်သည့် မူများနှင့် ရွေးသည်ကို ပြည်သူလူထု သိခွင့် ရှိကြောင်း၊ ဒီမိုကရေစီစနစ်တွင် ပြည်သူလူထုအနေဖြင့် အားလုံးကို သိပိုင်ခွင့်ရှိကြောင်း၊ နိုင်ငံ့အရေးနှင့် ပတ်သက်၍ မိမိ သိပိုင်ခွင့်ကို ကာကွယ်ရမည်ဖြစ်ကြောင်းလည်း ၎င်းက ပြောသည်။
ဒေါ်အောင်ဆန်းစုကြည်က လာမည့် ကြားဖြတ်ရွေးကောက်ပွဲ၌ အဆိုပါမြို့နယ်မှ ဝင်ရောက်ယှဉ်ပြိုင်မည့် NLD ကိုယ်စားလှယ် ဒေါ်ဖြူဖြူသင်းအတွက် အာမခံကြောင်း ပြောဆို၍ အဘယ်ကြောင့် ဒေါ်ဖြူဖြူသင်းအား ကိုယ်စားလှယ်အဖြစ် ရွေးချယ် လိုက်ခြင်း ဖြစ်ကြောင်း ရှင်းပြသည်။
“ကိုယ်စားလှယ်တွေ ရွေးတဲ့အခါမှာ အခြေခံအားဖြင့်တော့ ပြည်သူတွေက လေးစားမယ့်သူတွေ၊ ဒီမိုကရေစီအရေးမှာ သစ္စာ ရှိခဲ့တဲ့ ပုဂ္ဂိုလ်တွေကို ကြည့်ပါတယ်။ ဒါပေမယ့် ဒါနဲ့တင် မကသေးပါဘူး။ အဓိက ပြည်သူ့ ကိုယ်စားလှယ်တွေ ရွေးတယ်ဆိုရင် ပြည်သူတွေအတွက် ဘယ်လောက် လုပ်နိုင်မလဲ၊ ပြည်သူတွေရဲ့အကျိုးကို ဘယ်လောက်ထိ၊ ဘယ်လိုနည်းနဲ့ ထမ်းဆောင် နိုင်မလဲ ဆိုတာကို ကြည့်ပြီးတော့ ရွေးတယ်။ ပညာအရည်အချင်းနဲ့ အလုပ်အကိုင် ကျွမ်းကျင်မှု၊ အလုပ်အကိုင်အတွေ့အကြုံကို ကျမတို့ အလေးထားပါတယ်။ ပညာကလည်းရှိမယ်၊ အလုပ်အကိုင် ကျွမ်းကျင်မှုလည်းရှိမယ်၊ အလုပ်အကိုင်အတွေ့အကြုံလည်း ရှိမယ်ဆိုမှ ပြည်သူတွေ အတွက် လုပ်သင့်လုပ်ထိုက်တာကို လုပ်ပေးနိုင်မှာပါ” ဟု ဒေါ်အောင်ဆန်းစုကြည်က ဆိုသည်။
ဒေါ်ဖြူဖြူသင်းသည် ပြည်သူ့အကျိုးကို ထမ်းဆောင်ချင်စိတ် ရှိရုံမက၊ ထမ်းဆောင်နိုင်သည့် အရည်အချင်းလည်း ရှိကြောင်း၊ ထိုသို့ ပြည်သူ့အကျိုး ထမ်းဆောင်နိုင်သည့် အရည်အသွေးနှင့် ပြည့်စုံသည်ကို သက်သေနှင့်တကွ မြင်တွေ့ကြရပြီး ဖြစ်ကြောင်း ၎င်းက ဆက်ပြောသည်။
NLD ပါတီ၏ မင်္ဂလာတောင်ညွန့် မြို့နယ် ရုံးကို ယနေ့နံနက် ၉ နာရီက ဖွင့်လှစ်ခဲ့ရာ ဒေါ်အောင်ဆန်းစုကြည်က NLD သည် တရားဝင် ပါတီဖြစ်ပြီးသည့်အတွက် မဲဆွယ်စည်းရုံးမှု စတင် လုပ်ဆောင်နိုင်ပြီ ဖြစ်သော်လည်း ကိုယ်စားလှယ် တဦးချင်းစီ အနေဖြင့် ဖေဖော်ဝါရီ ၁၀ ရက်နေ့ နောက်ပိုင်းမှသာ တရားဝင် မဲဆွယ်ခွင့်ရှိကြောင်း၊ ထို့ကြောင့် ယခုအချိန်တွင် ၎င်းအနေဖြင့် မင်္ဂလာ တောင်ညွှန့် မြို့နယ် NLD ကိုယ်စားလှယ် ဒေါ်ဖြူဖြူသင်း အတွက် မဲဆွယ်ပေးခြင်းဖြစ်ကြောင်း ရှင်းပြသည်။
ကြားဖြတ်ရွေးကောက်ပွဲ ကျင်းပမည့် ဧပြီ ၁ ရက်နေ့တွင် မဲပေးပိုင်ခွင့် ရှိသူတိုင်း မဲပေးကြရန်၊ မင်္ဂလာတောင်ညွန့်မြို့နယ် ပြည်သူလူထု အနေဖြင့် ဒေါ်ဖြူဖြူသင်းအား မဲထည့်ကြရန် ဒေါ်အောင်ဆန်းစုကြည်က တိုက်တွန်းသည်။
ရန်ကုန်တိုင်း၊ ပဲခူးတိုင်း၊ ဧရာဝတီတိုင်း၊ မန္တလေးတိုင်း၊ ရှမ်းပြည်နယ်၊ မွန်ပြည်နယ် စသည့် ဒေသများရှိ လစ်လပ်နေသည့် မဲဆန္ဒနယ် ၂၂ ခု အတွက် NLD ကိုယ်စားလှယ်လောင်း စာရင်းကို ဇန်န၀ါရီ ၁၂ ရက်နေ့တွင် ထုတ်ပြန်ထားပြီး ကျန် ၂၆ နေရာ အတွက် အမည်စာရင်းကို မကြာမီ ထုတ်ပြန်မည်ဖြစ်ကြောင်း သိရသည်။
ဧရာဝတီ
0 comments:
Post a Comment