မြန်မာနိုင်ငံ လူ့အခွင့်အရေးကော်မရှင်က အင်းစိန်အကျဉ်းထောင်နှင့် လှေလှော်အင်းရဲဘက်စခန်းများသို့ သွားရောက်လေ့လာပြီးနောက် ထုတ်ပြန်လိုက်သည့် ထုတ်ပြန်ချက်သည် အကျဥ်းထောင်များအတွင်း လက်တွေ့အဖြစ်အပျက်များနှင့် ကွာဟလျှက်ရှိကြောင်း နိုင်ငံရေး အကျဉ်းသားဟောင်းများ ကပြောသည်။
ဒီဇင်ဘာ ၃၀ ရက်နေ့နေ့စွဲဖြင့် ထုတ်ပြန်သည့် ကော်မရှင်၏ ထုတ်ပြန်ချက်တွင် အင်းစိန်အကျဉ်းထောင်နှင့် လှေလှော်အင်းရဲဘက်စခန်းတို့တွင် အကျဉ်းသားများအတွက် ကျန်းမာရေးစောင့်ရှောက်မှု၊ အနားယူမှု၊ နေ့စဉ်အစားအစာကျွေးမွေးမှု၊ ဘာသာစကားနှင့် ကွန်ပျူတာသင်တန်း၊ ကျောင်းပညာရေးသင်ကြားပေးမှုနှင့် ဘာသာရေးဆိုင်ရာကိစ္စရပ်များ စသည်တို့ကို ဆောင်ရွက်ပေးလျက်ရှိကြောင်း နှင့် အကျဉ်းသားများ၏ အဆင်မပြေမှုများ၏ အကြောင်းရင်းခံသည် ကျဉ်းထောင်တွင်း အများဆုံးထားရှိနိုင်သည့် အရေအတွက်ထက် ပိုမိုထားရှိခြင်း ဖြစ်သည်ဟု ဖေါ်ပြပါရှိသည်။
သို့ရာတွင် နိုင်ငံရေး အကျဉ်းသားဟောင်းများက “ ကျွန်တော်တို့က လက်တွေ့ခံစားလာရတဲ့သူတွေပါ၊ သူတို့ (အမျိုးသား လူ့အခွင့်အရေးကော်မရှင်) ပြောတာနဲ့ လက်တွေ့နဲ့က ကွာဟ ချက်တွေရှိပါတယ်၊ အားလုံးက သူတို့လာတုန်း အမြင်လှအောင် ပြထားတာပဲရှိတယ်၊ ခေတ်အဆက်ဆက် ဒီလိုပဲ လိမ်နေကြတာပဲ’’ အင်းစိန်အကျဉ်းထောင်မှ ယနေ့ လွတ်မြောက်လာသူ ဦးသန်းနိုင်ဦးက ဟုပြောသည်။
၎င်းကပင် “ သင်တန်းဆိုတာလည်း အကန့်အသတ်ရှိတယ်။ လူတိုင်းတက်လို့မရဘူး။ ပြီးတော့ ထိရောက်တဲ့သင်ကြားမှု မရှိဘူး။ ကျန်းမာရေးစောင့်ရှောက်မှုဆိုတဲ့နေရာမှာလည်း ထိရောက်မှုမရှိပါဘူး။ တကယ်ကို ဝေဒနာခံစားနေရလို့ ထောင်ဆေးရုံသွားပြတာကို တရုတ် ပါရာစီတမော တိုက်လွှတ်လိုက်တာတောင် ကြုံဖူးတယ်” ဟု ပြောကြားသည်။
အဆိုပါဦးသန်းနိုင်ဦးသည် မေလ ၂၂ ရက်နေ့က အင်းစိန်အကျဉ်းထောင်တွင် ပြုလုပ်ခဲ့သော အထွေထွေလွတ်ငြိမ်းချမ်းသာခွင့် အမိန့်ထုတ်ပြန်ရေးအတွက် အစာအငတ်ခံ ဆန္ဒပြရာတွင် ပါဝင်ခဲ့သူတစ်ဦးဖြစ်သည်။
မကြာမီ လပိုင်းက လွတ်မြောက်လာသူ နိုင်ငံရေးအကျဥ်းသားဟောင်း ကိုကိုကြီး(စမ်းချောင်း) ကလည်း အကျဉ်းထောင်များတွင် ကျန်းမာရေးစောင့်ရှောက်မှုမလုံလောက်ကြောင်း၊ ၄င်း၏အတွေ့အကြုံအရ ရေသန့်ရရှိမှု မလုံလောက်ခြင်းနှင့် မိလ္လာစနစ် မသန့်ရှင်းခြင်းတို့သည် အကျဥ်းသားများ၏ ကျန်းမာရေးပြဿနာများနှင့် ဆက်စပ်နေကြောင်း ပြောကြားသည်။
“ ထောင်ထဲမှာ ကျန်းမာရေးစောင့်ရှောက်မှုပေးတယ်ဆိုတာ ဒီနှစ်အတွက် အကောင်းဆုံးပျက်လုံးလို့ ပြောလို့ရတယ်။ လုံးဝမလုံလောက်တဲ့ ကိစ္စတစ်ခုပါ။ ကျွန်တော်ကိုယ်တိုင် ထောင်ကလွတ်ခါနီး တစ်ပတ်လောက်အလိုမှာ ခါးနာတာ ဆေးခန်းသွားပြတော့ ဆေးရှိပြီး ဆေးထိုးအပ်မရှိလို့ မထိုးခဲ့ရဘူး။ ပြီးတော့ ထောင်ထဲမှာ ရေသန့်ရတဲ့နှုန်းက လူ ၁၅၀၀ ကို ၅၀၀ လီတာပဲရတာ။ မလောက်ဘူး” ဟု ၎င်း ကပင် ပြောကြားသည်။
အကျဉ်းထောင်များရှိ အကျဥ်းသားများအတွက် အရေးအကြီးဆုံးမှာ ကူးစက်ရောဂါဆိုင်ရာ ကျန်းမာရေးစောင့်ရှောက်မှုဖြစ်ကြောင်းကို ၈၈ မျိုးဆက်မှ နိုင်ငံရေးအကျဉ်းသားဟောင်း ဦးချစ်ကိုလင်းကလည်း ဆိုသည်။
အမျိုးသားလူ့အခွင့်အရေးကော်မရှင်သည် ယခင်ကလည်း ရခိုင်ပြည်နယ် ဘူးသီးတောင်ရှိ အကျဥ်းစခန်းကို သွားရောက်လေ့လာခဲ့ဘူးသည်။ သို့သော် အင်းစိန်အကျဥ်းထောင်နှင့် လှေလှော်အင်းအကျဉ်းထောင်များနှင့်ပတ်သတ်ပြီး လူ့အခွင့်အရေးကော်မရှင်၏ ထုတ်ပြန်ချက်သည် ကော်မရှင်၏ အကျဥ်းထောင်ဆိုင်ရာ ပထမဆုံးထုတ်ပြန် ကြေညာချက်ဖြစ်သည်။
လူ့အခွင့်အရေး ကော်မရှင်ကို ယမန်နှစ် စက်တင်ဘာလ ၅ ရက်နေ့တွင် အဖွဲ့ဝင် အငြိမ်းစား အစိုးရအရာရှိ ၁၅ ဦးဖြင့် ဖွဲ့စည်းခဲ့သည်။ ယုံကြည်ချက်ကြောင့် အကျဉ်းကျခံနေရသူများ ဟု ခေါ်ဆိုသုံးနှုန်းကာ နိုင်ငံရေး အကျဉ်းသားများနှင့် ပတ်သက်၍ နိုင်ငံတော် သမ္မတထံသို့ အိတ်ဖွင့်ပေးစာ ၂ စောင်လည်း ပေးပို့ခဲ့သည်။ ။
Yangon Press International
0 comments:
Post a Comment